ڪجهه وقت لاءِ فسادن تي ضابطو اچي ته پاڪستان وڌيڪ ترقي ڪندو: عظميٰ بخاري

لاهور (ويب ڊيسڪ) اطلاعات ۽ نشريات واري صوبائي وزير عظميٰ بخاري چيو آهي ته ڪجهه دير لاءِ فسادن تي ضابطو آندو وڃي ته پاڪستان وڌيڪ ترقي ڪندو. لاهور ۾ پريس ڪانفرنس ڪندي صوبائي سڌ سماءَ واري وزير عظميٰ بخاري چيو ته وزيراعليٰ پنجاب مريم نواز 8 کان 15 جولاءِ تائين چين جي سرڪاري دوري تي آهي. هن چيو ته وزيراعليٰ پنجاب چين جي 4 شهرن جو دورو ڪيو جتي هوءَ واحد وزيراعليٰ آهي جنهن کي چين ۾ رياست جي سربراهه جو پروٽوڪول مليو. ن ليگ اڳواڻ چيو ته مريم نواز هڪ زرعي سامان ٺاهيندڙ ڪمپني جو دورو ڪيو، چين جا ٽريڪٽر به هاڻي روبوٽ آهن، مريم نواز چيو ته ته اسان کي پنجاب ۾ ٽرانسپورٽ تي ڪم ڪرڻو آهي، اليڪٽرڪ بسن جو پهريون فليٽ جلد لاهور پهچڻو آهي . سڌ سماءَ واري وزير چيو ته اسان 5 سالن جو پلان ٺاهيو آهي، سموري ٽرانسپورٽ کي اليڪٽرڪ تي منتقل ڪرڻو آهي، وزيراعليٰ ڪمپني کي پنجاب ۾ سولر پلانٽ لڳائڻ جي اجازت ڏئي ڇڏي آهي، 60 کان وڌيڪ ڪمپنيون سيڙپ ڪرڻ تي راضي ٿي ويون آهن. عظميٰ بخاري چيو ته سڪيورٽي بابت ڪجهه خدشا آهن، مريم نواز چيني سيڙپڪارن جي سڪيورٽي يقيني بڻائڻ جو واعدو ڪيو آهي، جلد پنجاب ۾ چيني ڪمپنيون ڪم ڪندي نظر اينديون.