ايئن نه ٿيندو ته حملو ڪريو، سول نافرماني جي تحريڪ هلايو ۽ ڳالهيون به ٿين: خواجه آصف

اسلام آباد (ويب ڊيسڪ) دفاع واري وفاقي وزير خواجه آصف پي ٽي آءِ کي مخاطب ٿيندي چيو آهي ته جي توهان کي سول نافرماني ڪرڻي آهي ته ڪيو، ڌمڪين ۾ نه اينداسين. قومي اسيمبليءَ ۾ خيالن جو اظهار ڪندي خواجه آصف چيو ته مون ڪالهه به ان ڳالهه جي تصدي ڪئي هئي پر باضابطه ڳالهيون شروع ناهن ٿيون، هن چيو ته اهي ڳالهيون ته ڪميٽي جڙي وئي آهي ۽ هيئن ٿي ويو آهي، ان سلسلي ۾ هاڪاري ردعمل تڏهن ئي اچي سگھي ٿو جڏهن ڪا اڳڀرائي ٿيندي، جڏهن ته شير افضل مروت جيڪا ڳالهه ڪئي اها خوشگوار هوا جو جھوٽو آهي. هن چيو ته جي توهان ڪڙي ڳالهه ڪندو ته ڪڙاڻ وڌندي، گن پوائنٽ تي ڳالهيون نٿيون ٿي سگھن، اهو نٿو ٿي سگھي ته توهان حملو ڪريو، سول نافرماني جي تحريڪ هلايو ۽ توهان وري اهو سوچيو ته توهان سان ڳالهيون به ٿينديون.