انسان هجن يا ملائڪ، پي ٽي آءِ ڳالهين لاءِ تيار آهي: عمر ايوب

راولپنڊي (ويب ڊيسڪ) پاڪستان تحريڪ انصاف جي مرڪزي اڳواڻ عمر ايوب جو چوڻ آهي ته انسان هجن يا ملائڪ اسان ڳالهين جي لاءِ تيار آهيون. تحريڪ انصاف جي ڳالهين جي پاليسي واضح ڪري ڇڏي آهي، راولپنڊيءَ ۾ ميڊيا جي نمائندن سان ڳالهائيندي عمر ايوب جو چوڻ هو ته هيءَ حڪومت ملڪ کي درپيش مئسلن جو حل ناهي، عدل ۽ قانون جي حڪمراني آڻڻي پوندي، هن وقت هتي صرف فاشزم ۽ ڏنڊو آهي. عمر ايوب جو چوڻ هو ته باني پي ٽي آءِ عمران خان 5 رڪني ڳالهين واري ڪميٽي جوڙي ڇڏي آهي، جي ڳالهيون نه ٿيو ته 13 ڊسمبر تي تحريڪ انصاف اڳئين مرحلي جو اعلان ڪندي، سول نافرمانيءَ جي تحريڪ شروع ڪنداسين. ان موقعي تي سينيٽ ۾ مخالف ڌر جي اڳواڻ شبلي فراز جو چوڻ هو ته جعلي حڪومت اسان کي جعلي ڪيسن ۾ مصروف رکڻ ٿي چاهي جڏهن ته پي ٽي آءِ چيئرمين بئريسٽر گوهر چيو ته 26 نومبر تي پي ٽي آءِ جي مارجي ويل ڪارڪنن جو تصديق ٿيل انگ 12 آهي، گم ٿيل ڪارڪنن جا تفصيل ڏسي رهيا آهيون، پارٽي چيئرمين طور جيڪا ڳالهه ڪنداسين سا پوري ذميواريءَ سان ڪنداسين.