مخصوص سيٽن جي ڪيس ۾ سپريم ڪورٽ جو اڪثريتري فيصلو ڏيندڙ 8 ججز ٻيو ڀيرو وضاحت جاري ڪري ڇڏي آهي
سپريم ڪورٽ پاران ٻيو ڀيرو وضاحت اليڪشن ڪميشن جي درخواست تي ڏني وئي، جنهن ۾ چيو ويو آهي ته اليڪشن ايڪٽ ۾ ترميم 12 جولائي واري فيصلي تي لاڳو نٿي ٿي سگهي، اليڪشن ايڪٽ ۾ ترميم کي ماضي تي لاڳو جو سبب بڻائي فيصلي کي غيراثرائتو نٿو ڪري سگهجي.
سپريم ڪورٽ جو چوڻ آهي ته ان معاملي تي ڪراچي ۽ اسلام آباد ۾ چيمبرز ۾ ٻڌڻي ٿي آهي، وضاحت لاءِ رابطي جو حق ان لاءِ ڏنو هو ته جئين مختصر حڪمنامي تي عملدرآمد ۾ پريشاني نه ٿئي، هاڻي تفصيلي فيصلو جاري ٿي چڪو آهي، ڪنهن به وضاحت جي ضرورت ناهي ٿي.
اڪثريتي ججز چيو ته تفصيلي فيصلي ۾ سمورن قانوني ۽ آئيني نقطن جو احاطو ڪيو ويو آهي، تفصيلي سبب جاري ڪرڻ کان اڳ وضاحت جاري ڪري چڪا آهيون، مختصر حڪمنامي موجب جاري پهرين وضاحت کي به تفصيلي سببن ۾ شامل ڪيو ويو هو.
ججز چيو ته تفصيلي سبب پهريان جاري ٿي چڪا آهن، ڌرين طرفان اٿاريل سمورن قانوني ۽ آئيني معاملن کي جامع طور تي اڪلايو ويو آهي، عدالت جو فيصلو آئين جي آرٽيڪل 189 تحت لاڳو آهي ۽ ان تي عمل ٿيڻ گهرجي ها. ياد رهي ته سپريم ڪورٽ 12 جولاءِ تي محفوظ ڪيل سيٽن واري ڪيس جو فيصلو جاري ڪيو هو
