ڪرم ضلعي ۾ ڇڪتاڻ، وڌيڪ 18 ڄڻا مارجي ويا، صوبائي حڪومت جي هيلي ڪاپٽر تي فائرنگ

ڪرم (ويب ڊيسڪ) ضلعي ڪرم ۾ مسافر گاڏين تي اڻڄاتل هٿياربندن جي فائرنگ سبب 43 ڄڻن جي مارجي وڃڻ کان پوءِ ضلعي ڪرم ۾ فسادن ۽ ڏڦيڙن ۾ تيزي اچي وئي آهي، فائرنگ جي تازن واقعن ۾ وڌيڪ 18 ڄڻا مارجي ويا آهن، جڏهن ته 30 ماڻهو زخمي ٿي پيا آهن. ڊان نيوز موجب پوليس ٻڌايو ته ضلعي ڪرم جي تعلقي لوئر ڪرم جي علائقي عليزئي ۽ بگن جي قبيلن جي وچ ۾ ڇتي فائرنگ جو سلسلو جاري آهي، ان کان سواءِ بالش خيل، خار ڪلي، ڪنج عليزئي، مقبل قبيلن جي وچ ۾ فائرنگ جي ڏي وٺ ٿي رهي آهي. پوليس ذريعن موجب ڌرين جي وچ ۾ ويڙهه جو سلسلو خميس تي مسافر گاڏين تي فائرنگ کان پوءِ شروع ٿيو آهي ۽ هاڻي ڌريون هڪ ٻئي تي ڳرن ۽ آٽوميٽڪ هٿيارن سان فائرنگ ڪري رهيون آهن. پوليس موجب تازي جھيڙاند ۾ هن وقت تائين 18 ڄڻا مارجي ويا آهن ۽ 30 کان وڌيڪ ماڻهو زخمي ٿي پيا آهن، ڌرين ۾ ويڙهه دوران گھرن ۽ دڪانن کي به نقصان پهتو آهي. هوڏانهن پارا چنار ۾ خيبرپختون خواه حڪومت جي هيلي ڪاپٽر تي فائرنگ جو واقعو پيش آيو آهي. ذريعن موجب هيلي ڪاپٽر ۾ صوبائي قانون وارو وزير آفتاب عالم ايڊووڪيٽ جي سربراهيءَ ۾ وفد موجود هو ۽ وفد ڪي پي جي وڏي وزير علي امين گنڊاپور جي هدايتن تي روانون ٿيو هو. وفد ڪرم ۾ امن امان جو جائزو وٺڻ ۽ امن جرڳي کي ٻيهر فعال ڪرڻ لاءِ وڃي رهيو هو، جنهن ۾ چيف سيڪريٽري اسلم چوڌري، ڪمشنر ڪوهاٽ ڊويزن، ڊي آءِ جي ڪوهاٽ ۽ ٻيا هيليڪاپٽر ۾ شريڪ هئا. صوبائي حڪومتي هيلي ڪاپٽر فائرنگ باوجود محفوظ رهيو.