اسلام آباد (نيشنل ڊيسڪ) چيف جسٽس آف پاڪستان جسٽس يحيٰ آفريءَ سپريم ڪورٽ ۾ نون ججن جي آمد کان پوءِ ڪيترين ئي انتظامي ڪميٽين ۾ وڏي پئماني تي بدلاءَ آندا آهن.
چيف جسٽس يحيٰ آفريديءَ پنهنجي سربراهيءَ ۾ 6 رڪني ڪيس مئنيجمينٽ ڪميٽي جوڙي ڇڏي جنهن ۾ جسٽس نعيم اختر افغان، جسٽس شاهد بلال حسن، جسٽس محمد شفيع صديقي ۽ ايڊيشنل رجسٽرار (جڊيشل) شامل آهن.
آءِ ٽي ڊائريڪٽر ان جو سيڪريٽري هوندو، ڪميٽي ڪيس مئنيجمينٽ کي هموار ڪري عدالتي ڪم ۾ ڪارڪردگيءَ کي يقيني بڻائيندي.
چيف جسٽس پاڪستان ۾ خاص عدالتن (دهشتگرديءَ جي انت واريون عدالتون) جي ڪارڪردگيءَ جي نگرانيءَ جي لاءِ سپريم ڪورٽ جي 5 ججن کي به مقرر ڪيو، جسٽس مسرت هلالي خيبرپختون خوا ۾ اي ٽي سيز جو مانيٽرنگ جج هوندو جڏهن ته جسٽس ملڪ شهزاد احمد خان، جسٽس هاشم خان ڪاڪڙ ۽ جسٽس صلاح الدين پنهور ترتيبوار پنجاب، بلوچستان ۽ سنڌ ۾ مانيٽرنگ ججن جي حيثيت سان ڪم ڪندا، جسٽس عامر فاروق اسلام آباد جي خاص عدالتن جو مانيٽرنگ جج هوندو.
چيف جسٽس، جسٽس ملڪ شهزاد احمد، جسٽس هاشم ڪاڪڙ، جسٽس صلاح الدين پنهور ۽ جسٽس اشتياق ابراهيم تي ٻڌل ڪميٽي کي ماڊل ڪورٽس جي نگراني جو ٽاسڪ به حوالي ڪيو آهي.
سپريم ڪورٽ جي آءِ ٽي افيئرز ڪميٽي ۾ به تبديليون ڪيون ويون آهن جنهن ۾ چيف جسٽس ان جو چيئرمين هوندو، جڏهن ته جسٽس محمد علي مظهر ۽ جسٽس ميان گل حسن اورنگزيب ان جا مميبر هوندا.
چيف جسٽس يحيٰ آفريديءَ اهو به حڪم جاري ڪيو ته سپريم ڪورٽ رولز 1980ع جي آرڊر فائيو جي تحت چيمبرز ۾ متفرق اپيلون ۽ آرڊر جي لاءِ درخواستون چيف جسٽس ۽ ٻين ججن جي سامهون پيش ڪيون ويندو.
