ڪراچي (ويب ڊيسڪ) ڪراچي جي لانڍي ڊسٽرڪٽ جيل مان 22 ڀارتي مهاڻن کي آزاد ڪيو ويو.
جيل مان آزادي ماڻيندڙ ڀارتي مهاڻن کي سرڪاري اداري جي نگرانيءَ ۾ ايڌي فائونڊيشن جي انتظامن هيٺ بس وسيلي لاهور منتقل ڪيو ويو جتان واهگا بارڊر رستي کين ڀارت روانون ڪيو ويندو.
ڊپٽي سپرنٽينڊنٽ لانڍي جيل ارشد شاهه موجب آزادي ماڻيندڙ 22 ڀارتي مهاڻن مان ٽي مسلمان ۽ 19 هندو آهن.
مهاڻن کي پاڪستاني سامونڊي حدن ۾ گذريل اڍائي کان ٽن سالن دوران غير قانوني طور مڇي جي شڪار تي پاڪستاني عملدارن گرفتار ڪيو هو ۽ هنن مقامي عدالتن مان مليل ڏوهه جي سزا مڪمل ڪري ورتي آهي.
مهاڻن کي انساني همدرديءَ جي بنياد تي آزاد ڪري کين ڏيهه روانو ڪيو پيو وڃي، جيل مان آزاديءَ وقت مهاڻن کي خرچ جي مناسب رقم سميت تحفا به ڏنا ويا.
