اجلاس کي ڀارتي حملن ۽ پاڪستاني جوابي ڪارروائيءَ تي هٿياربند فوج جي عملدارن بريفنگ ڏني، واکاڻ
اسلام آباد (نيشنل ڊيسڪ) وزيراعظم شهباز شريف ڀارتي اڳراين ۽ پاڪستان جي ڀرپور جواب تي قومي اسيمبلي ۾ خطاب ۽ ميمبرن کي اعتماد ۾ وٺڻ جو فيصلو ڪيو آهي.
وزيراعظم شهباز شريف جي صدارت هيٺ قومي سلامتي ڪاميٽي جو هنگامي اجلاس ختم ٿيو جنهن ۾ ڀارتي حملي ۽ ان بعد پاڪستاني جوابي ڪارروائي جي صورتحال تي غور ڪيو ويو.
وزيراعظم جي صدارت ۾ قومي سلامتي ڪاميٽيءَ جو اجلاس 2 ڪلاڪ جاري رهيو، جنهن اعليٰ فوجي قيادت، وزير، صلاحڪار ۽ ٻيون اهم شخصيتون شريڪ ٿيون.
اجلاس ۾ ڀارت جي جنگي حملن، پاڪستاني فوج پاران جوابي ڪارروائيءَ ۽ خطي ۾ وڌندڙ ڇڪتاڻ تي تفصيلي غور ويچار ڪيو ويو.
عملدارن موجب وزيراعظم شهباز شريف اسيمبلي ميمبرن کي اعتماد ۾ وٺڻ جو فيصلو ڪيو ۽ وزيراعظم قومي اسيمبلي ۾ خطاب ڪندو.
ذريعن جو چوڻ آهي ته اجلاس ۾ ڀارتي اڳراين خلاف پاڪستان کي اڳتي جي حڪمت عملي تي غور ڪيو ويو، جڏهن ته اجلاس ۾ سفارتي قدمن، عالمي برادريءَ سان رابطن بابت صلاح مشورا پڻ ڪيا ويا.
اجلاس ۾ ڀارتي حملن ۽ پاڪستاني جوابي ڪارروائيءَ تي هٿياربند عملدارن بريفنگ ڏيندي ٻڌايو ته پاڪستان ڀارتي حملن جو فوري جواب ڏيندي ڀارتي فوجي ٿاڪن کي نشانو بڻايو ۽ ڀارت جا 5 جهاز ڪيرايا جڏهن ته بريگيڊ هيڊڪوارٽر کي به تباهه ڪيو ويو.
ان سلسلي ۾ ذريعن جو چوڻ هو ته ڀارت کي ڀرپور جواب ڏيڻ تي ڪاميٽيءَ طرفان پاڪ فوج جي ڀرپور واکاڻ ڪئي وئي.
ذريعن جو چوڻ آهي ته قومي سلامتي ڪاميٽيءَ پاڪ فوج کي ڀارت جي خلاف جوابي ڪارروائين جو مڪمل اختيار ڏئي ڇڏيو.
ان موقعي تي وزيراعظم شهباز شريف جو چوڻ هو ته سموري قوم پنهنجي بهادر هٿياربند فوج سان گڏ آهي، پاڪستان جي خودمختياري، سالميت ۽ عزت کي ڪوسو واءُ لڳڻ نه ڏنو ويندو.
اجلاس ۾ ٽنهي هٿياربندن فوجن جا سربراهه، بچاءَ وارو وفاقي وزيراطلاعات وارو وفاقي وزير به شريڪ ٿيو.
