اسرائيل ۽ ايران ۾ صرف جنگبندي نه پر تڪرار جي حقيقي خاتمي جو خواهشمند آهيان: آمريڪي صدر
واشنگٽن (انٽرنيشنل ڊيسڪ) آمريڪي صدر ڊونلڊ ٽرمپ فراسيسي صدر جي دعويٰ کي غلط ثابت ڪندي چيو آهي ته واشنگٽن واپسيءَ جو مقصد جنگ بندي ناهي، ڳالهه ان کان وڏي آهي.
آمريڪي صدر جو چوڻ هو ته اسرائيل ۽ ايران جي وچ ۾ صرف جنگبندي نه پر تڪرار جي حقيقي خاتمي جو خواهشمند آهيان.
جي-7اجلاس اڌ ۾ڇڏي واشنگٽن واپس پهچڻ کان پوءِ آمريڪي صدر ٽرمپ پنهنجي ٽُرٿ سوشل ميڊيا پوسٽ ۾ فرانسيسي صدر ايمانوئل ميڪرون کي مشهوريءَ جو مطلبگار قرار ڏيندي لکيو ته ”ميڪرون غلطيءَ سان چيو آهي ته ڪينيڊا ۾ ٿيندڙ جي-7 سمٽ ڇڏي ان لاءِ واشنگٽن واپس پيو وڃان جيئن اسرائيل ۽ ايران وچ ۾ سيز فائر ڪرائي سگھجي.“
ٽرمپ چيو ته ”غلط! کيس ڪو ادراڪ ناهي ته مان واشنگٽن ڇو پيو وڃان! ان جو سيز فائر سان ڪو تعلق ناهي، ڳالهه ان کان وڏي آهي، ڀلي ڄاڻي واڻي ٿئي يا نه ٿئي، ايمانوئل هميشه ڳالهه غلط ئي ڪندو آهي، خبردار رهو!“
ياد رهي ته فرانسيسي صدر ايمانوئل ميڪرون سومر تي دعويٰ ڪئي هئي ته ٽرمپ ايران ۽ اسرائيل جي وچ ۾ جنگبنديءَ جي آڇ ڪئي آهي.
فرانسيسي صدر چيو هو ته ”هڪ آڇ ڪئي وئي آهي ته ملاقات ٿئي ۽ پوءِ خاص طور تي جنگ بنديءَ تي خيالن جي ڏي وٺ ڪئي وڃي، ۽ پوءِ وڏي پئماني تي ڳالهين جي شروعات ڪئي وڃي.“
