پاڪ فوج هڪ ڀيرو ٻيهر ثابت ڪيو ته ملڪ جي دفاع لاءِ تيار آهي: شڪراني واري تقريب کي خطاب
ڪراچي (ويب ڊيسڪ) سنڌ جي وڏي وزير سيد مراد علي شاهه چيو آهي ته سڄي دنيا ۾ ڀارت جو ڪوڙ ۽ واويلا وائکي ٿي چڪي، پاڪ فوج هڪ ڀيرو ٻيهر ثابت ڪيو ته ملڪ جي دفاع لاءِ تيار آهي.
ڪراچي ۾ پ پ جي انتظام هيٺ ڀارت خلاف ڪاميابي تي شڪراني جي تقريب کي خطاب ڪندي وڏي وزير چيو ته سڄي قوم هٿياربند فوج سان مضبوط ڀت جيان بيٺل آهي.
ڀارت سوچيل سمجهيل سازش تحت پاڪستان تي حملو ڪيو، حقيقت ۾ ڀارت ڪجهه نٿو ڪري سگهي، پهلگام واقعي جي ڪلاڪ اندر ڀارت پاڪستان تي الزام مڙهيو.
هن چيو ته سڄي دنيا پهلگام واقعي جي شفاف جاچ جو مطالبو ڪيو، ڀارت کي پنهنجي ذلت ئي ڪرائڻي هئي، جيڪا ان جو مقدر هئي، هو پاڪستان طرف اک کڻي ڏسندڙن جي اک ڪڍي ڇڏيندا.
وڏي وزير مراد علي شاهه طرفان ڀارتي حملن ۾ شهيدن جي وارثن لاءِ هڪ -هڪ ڪروڙ ۽ زخمين لاءِ 10-10 لک رپين جو اعلان.
وڏي وزير چيو ته اسڪول به شهيد مختيار لغاريءَ جي نالي سان منسوب ڪيو ويندو.
پاڪ- ڀارت جنگ دوران اليڪٽرانڪ ميڊيا، سوشل ميڊيا تي اهم ڪردار ادا ڪندڙ اينڪرس، صحافين، اداڪارن ۽ سوشل ميڊيا انفلوئنسرز کي مڃتا طور شيلڊز سان نوازيو ويو.
وڏي وزير مراد علي شاهه ۽ پ پ ليڊيز ونگ جي صدر فريال ٽالپر شيلڊز ڏنيون، ڏهرڪي ۾ ڊرون حملي ۾ شهيد ٿيل مختيار لغاري جي والد کي پڻ شيلڊ پيش ڪئي ويئي.
