ڪئنالن تي ڪو ڪم ناهي ٿيو، نه ئي منظوري ڏني وئي آهي: سنڌ جو وڏو وزير

وزيراعظم تسليم ڪيو ته جيستائين اتفاق نه ٿيندو، تيستائين ڪئنال نه ٺهندا: مراد علي شاهه

ڪراچي (ويب ڊيسڪ) سنڌ جي وڏي وزير مراد علي شاهه چيو آهي ته ڪئنالن تي ڪو ڪم ناهي ٿيو، نه ئي منظوري ڏني وئي آهي.

ڪراچي ۾ پريس ڪانفرنس ڪندي سيد مراد علي شاهه چيو ته وزيراعظم تسليم ڪيو ته جيستائين اتفاق نه ٿيندو، تيستائين ڪئنال نه ٺهندا.

مراد علي شاهه چيو ته صدر وٽ ڪئنالن جي منظوري بابت ڪو به انتظامي اختيار نه آهي، وزيراعظم ڪئنال منصوبي کي ختم ڪرڻ جو اعلان نٿو ڪري سگهي.

وڏي وزير چيو ته ارسا سرٽيفڪيٽ جاري ڪيو هو، سي سي آءِ ۾ ئي رد ٿيندو، سي سي آءِ اجلاس ۾ ئي ڪئنال منصوبي کي رد ڪرائي سگهجي ٿو.

مراد علي شاهه چيو ته گڏيل مفادن واري ڪائونسل جو اجلاس 2 مئي تي ٿيندو، ڪو مڃي يا نه مڃي، جيستائين پيپلزپارٽي هوندي، ڪئنال نه ٺهندا.

هن چيو ته حڪومت کان ڌار ٿي سگهون ٿا پر ڪهڙي ضمانت آهي ته ڪئنال منصوبو رڪجي ويندو؟ نگران حڪومت آئي ۽ ڪجهه اهڙا فيصلا ٿي ويا، ان جو ذميوار ڪير هوندو؟

وڏي وزير چيو ته پيپلزپارٽي سنڌ جي ماڻهن جي حقن جي ضامن آهي، سنڌ جي منظوري کان سواءِ ڪو به ڪئنال نٿو ٺهي سگهي.

سندس چوڻ هو ته ڪالا باغ ڊيم جيان ڪئنالن وارو معاملو  به دفن ٿيڻ پيو وڃي، پيپلزپارٽي کي بدنام ڪندڙ ناڪام ٿي ويا آهن.

سنڌ خلاف ڪنهن به منصوبي جي حمايت نه ڪنداسين، شهيد ذوالفقار علي ڀٽو ڦاهي چڙهي ويو پر سوديبازي نه ڪيائين.

وڏي وزير چيو ته ڀارت کي واضح پيغام ڏنو ته اڳرائي جو ڀرپور جواب ڏينداسين، ڀارت پهلگام واقعي جو بنا ثبوتن جي پاڪستان تي الزام لڳايو.

پهلگام واقعي تي ڀارت جي لڳايل الزامن جي مذمت ڪيون ٿا، سنڌ طاس معاهدي جي معطلي جي مذمت ڪيون ٿا.

مراد علي شاهه چيو ته پيپلزپارٽي پاڪ فوج سان گڏ آهي، هاڻي ڀارت پاڪستاني هوائي حدون استعمال نه ڪري سگهندو.

ملڪي سلامتي جي معاملن تي سڀ پارٽيون هڪ پيج تي آهن، ڪئنالن واري معاملي تي اسان جو موقف سچ ثابت ٿيو.

ڪئنالن تي ڪو ڪم نه ٿيو آهي، نه ئي منظوري ڏني وئي آهي، هر پاسي کان تصديق ٿي آهي ته ڪئنالن تي ڪو ڪم ناهي ٿيو.

وڏي وزير چيو ته ڪئنال نه ٺهندا، وزيراعظم شهبازشريف خاطري ڪرائي آهي، ڪئنالن وارو معاملو گڏيل مفادن واري ڪائونسل ڏانهن موڪليو آهي.

ڪجهه ماڻهو پيپلزپارٽي خلاف مهم هلائي رهيا آهن، نگران حڪومت ۾ ارسا پاڻي دستيابيءَ جو سرٽفڪيٽ جاري ڪيو ويو.

هن چيو ته چولستان ڪئنال منصوبو نومبر کان ايڪنڪ ۾ هو، منصوبي جي پيڙهه جو پٿر رکڻ واري تقريب ٿي، جيڪا نه ٿيڻ گهرجي ها

وڏي وزير چيو ته 8 جولاءِ تي صدرجي ميٽنگ بابت ٽوئٽر تي بيان جاري ٿيو هو، ٽوئٽر اڪائونٽ صدر پاڻ ناهي هلائيندو، غلطي ٿي سگهي ٿي.

10جولاءِ کان پوءِ ان ٽوئٽر اڪائونٽ تي ڪو به بيان جاري ناهي ٿيو، ضرور اهڙي ٽوئٽ کان پوءِ صدر آصف علي زرداري ڪو ايڪشن کنيو هوندو.

صدر وٽ ڪئنالن جي منظوري بابت ڪو به انتظامي اختيار ناهي، پرامن احتجاج ڀلي ڪيو وڃي پر ماڻهن کي تڪليف نه ڏني وڃي.

مراد علي شاهه چيو ته مون وڪيلن ۽ جي يو آءِ سان رابطو ڪيو آهي، مولانا راشد محمود سومرو ۽ وڪيلن احتجاج جاري رکڻ جو چيو آهي، هنن چيو ته سي سي آءِ اجلاس تائين احتجاج جاري رهندو.

وڏي وزير سيد مراد علي شاهه بند ڪيل روڊ کولڻ جي اپيل ڪري ڇڏي، سندس چوڻ هو ته احتجاج ڪندڙن کي ڌرڻا ختم ڪري روڊ کولڻ گهرجن.

ڪيترن ئي ڏينهن کان روڊ بند آهن، نقصان ٿي رهيو آهي، روڊ بند ڪرڻ ڪئنالن جي حق ۾ ناهي، اسان خلاف سازشون ٿينديون رهيون آهن، جنهن کي برداشت ڪيو آهي.

مراد علي شاهه چيو ته حڪومت پنهنجي موقف تان ڦري وئي ته اسان وٽ به آپشن موجود آهن، سنڌ خلاف ڪنهن به منصوبي جي حمايت نه ڪنداسين. پ

اڻي معاملي تي پيپلزپارٽي ڪا به سوديبازي نه ڪندي، اميد ته 2 مئي جي اجلاس ۾ ڪئنال رٿا جو فيصلو واپس ورتو ويندو، سي سي آءِ ۾ 8 ميمبر آهن، وزيراعظم کي اختيار ناهي ته منصوبو ختم ڪري.