اسلام آباد (نيشنل ڊيسڪ) سويلينز جي ملٽري ٽرائل خلاف انٽرا ڪورٽ اپيل تي سپريم ڪورٽ جي آئيني بينچ جي جج چيو ته پريڪٽس اينڊ پروسيجر ڪيس جي فيصلي ۾ ماضيءَ ۾ اپيل جو حق ملي ها ته سنه 73ع کان اپيلون اچن ها.
سپريم ڪورٽ ۾ سويلينز جي ڪورٽ مارشل بابت انٽرا ڪورٽ اپيلن تي ٻڌڻي جسٽس امين الدين جي سربراهيءَ ۾ 7 رڪني بينچ ڪري رهي آهي.
سول سوسائٽي جي وڪيل فيصل صديقي ايڊووڪيٽ پنهنجا دليل ڏيندي چيو ته فوجي عدالتن خلاف 7 رڪني بئنچ جا هڪ نه ٽي فيصلا آهن.
جسٽس عائشه ملڪ، جسٽس منيب اختر ۽ جسٽس يحيٰ آفريديءَ پنهنجا فيصلا لکيا، سمورن ججن کي هڪ ٻئي جي فيصلن سان اتفاق هو، فيصلا هڪ جھڙا ۽ سبب مختلف هجن ته سمورا سبب فيصلي جو حصو تصور ٿيندا آهن.
جسٽس محمد علي مظهر رمارڪس ڏنا ته ججن اضافي نوٽ نه پر فيصلو لکيو هو، جڏهن ته جسٽس جمال مندوخيل جو چوڻ هو ته سمورا پنج جج متفق هئا ته سويلينز جو ملٽري ٽرائل نٿو ٿي سگھي.
جسٽس محمد علي مظهر چيو ته عذير ڀنڊاري جو انحصار پريڪٽس اينڊ پروسيجر ڪيس ۾ جسٽس منصور جي نوٽ تي هو، پريڪٽس اينڊ پروسيجر فيصلن ۾ ماضي کان اپيلن جو حق ملي وڃي ها ته 73ع کان اپيلون اچن ها.
جنهن تي وڪيل فيصل صديقيءَ جو چوڻ هو ته اپيلن جو دائرو محدود ڪيو ويو ته اسان جون به ڪيتريون ئي اپيلون خارج ٿي وينديون.
جسٽس امين الدين جو چوڻ هو ته فيصلو ڏيڻ واري بئنچ ئي نظرثاني اپيل ٻڌي سگھي ٿي، جڏهن ته انٽرا ڪورٽ اپيل لارجر بئنچ ٻڌندي آهي، لارجر بئنچ ڪيس پهريون ڀيرو ٻڌي رهي هوندي آهي ان لاءِ اها پهرئين فيصلي جي پابند ناهي هوندي.
سول سوسائٽي جي وڪيل فيصل صديقيءَ جو چوڻ هو ته منهنجو آئيني بئنچ تي مڪمل اعتماد آهي.
ان تي جسٽس جمال مندوخيل ساڻس مڪالمو ڪندي چيو ته توهان ايئن ئي دليل ڏيندا رهيا ته لڳي ٿو ته توهان کي 3 مهينن تائين ٻڌڻو پوندو.
فيصلن صديقيءَ جو چوڻ هو ته آئيني بئنچ آرمي ائڪٽ جون شقون ڪالعدم قرار ڏيڻ کان سواءِ به سويلينز جو ٽرائل ڪالعدم ڪري سگھي ٿي، سيڪشن 94 تحت ڪمانڊنگ آفيسر کي جوابدارن جي حوالگيءَ جو صوابديدي اختيار درست ناهي.
جسٽس نعيم اختر افغان جو چوڻ هو ته پهرين ڏينهن کان پڇي رهيو آهيان ته اي ٽي سي جج جو جوابدار حوالي ڪرڻ جو ڪو باضابطه حڪمنامون آهي؟
جهن تي وڪيل فيصل صديقيءَ جو چوڻ هو ته حڪم نامون ته آهي پر ان ۾ سبب ناهن ڄاڻايا ويا.
جسٽس جمال مندوخيل پڇاڻو ڪيو ته ڇا عدالت کي پاڻ ڏسڻو پوندو آهي ته ان وٽ ٻڌڻ جو اختيار آهي يا نه؟ ڇا لازمي آهي ته ڪا ڌر ئي اختيار جي دائري جو اعتراض ڪري؟
جنهن تي جسٽس امين الدين چيو ته عدالت کي پاڻ ئي پنهنجي اختيار وارو دائرو طئي ڪرڻو پوندو آهي.
وڪيل فيصل صديقي جو چوڻ هو ته ڪو قائداعظم جي مزار جو قبضو گھري ته ڇا عدالت اهو چوندي ته ڪنهن اختيارن جي دائري تي اعتراض ناهي ڪيو؟
