اسلام آباد (نيشنل ڊيسڪ) وزيراعظم شهباز شريف چيو آهي ته ڪيس ٻڌڻ ۽ انتظام جو جديد نظام وقت جي ضرورت هئي، نئون نظام شفافيت ۽ تڪڙي انصاف جي فراهمي ۾ اهم ڪردار ادا ڪندو.
ڪيس اسائينمنٽ ايند مئنيجمينٽ سسٽم جي افتتاحي تقريب کي خطاب ڪندي وزيراعظم جو چوڻ هو ته نئين نظام ۾ سهڪار تي ڪينيڊا ۽ گڏيل قومن جا ٿورائتا آهيون.
سڄي ملڪ ۾ درخواستگذار شفاف ۽ تڪڙي انصاف جا خواهشمند هئا، بدقسمتي سان ماضي ۾ ٽريڪ اينڊ ٽريس سسٽم جو درست استعمال نه ٿيو.
وزيراعظم چيو ته اسان انهيءَ ٽريڪ اينڊ ٽريس سسٽم کي نئين سر شروع ڪيو آهي، ڪيترن ئي ڏهاڪان کان اسان جو نظام ڏکيائين جو شڪار رهيو آهي.
ميان شهباز شريف چيو ته ايف بي آر ۾ ٽريڪ اينڊ ٽريس سسٽم جو مقصد ٽيڪس جي اوڳاڙي هو، کربين رپين جا ٽيڪس ڪيس ٻڌڻي هيٺ آهن.
وزيراعظم جو وڌيڪ چوڻ هو ته پاڪستان ڪيترن ئي وسيلن سان مالا مال آهي، ٽيم جي سخت محنت کانپوءِ هاڪاري نتيجا سامهون اچي رهيا آهن.
ان کان اڳ وزيراعظم شهبازشريف سان ريٽيلرز جي وفد جي ملاقات ڪئي، وزيراعظم شهبازشريف پاران ريٽيلرز جي مسئلن جي حل لاءِ ڪميٽي ٺاهڻ جي هدايت ڪئي وئي.
ان موقعي تي وزيراعظم چيو ته ٽيڪس نيٽ ۾ موجود ريٽيلرز تي ٽيڪس جو وڌيڪ بار نه وڌو ويندو، ٽيڪس نه ڏيندڙ ريٽيلرز کي
ٽيڪس نيٽ ۾ آندو ويندو.
