ايٿينز (انٽريسٽنگ ڊيسڪ) يونان جي سياحتي جزيرن ۾ هڪ هفتي دوران زلزلي جا هزارين لوڏا محسوس ڪرڻ کان پوءِ اسڪولن ۾ موڪلون ويون آهن، جڏهن ته سياحن جي اچ وڃ تي به پابندي لڳائي وئي آهي.
فرانسيسي خابرو اداري موجب 3 هفتن کان ڊيونيسيا جي بائيو نالي ٽيچر يوناني جزيري امورگوس ۾ پنهنجي شاگردن سان پريشانين کي منهن ڏئي رهي آهي، جتي زلزلي جا هزارين لوڏا محسوس ڪيا ويا.
يوناني عملدارن جزيري امورگوس، ان جي مشهور پاڙيسري جزيرن سانتوريني ۽ٻين جزيرن تي واقع سمورا اسڪول بند ڪري 21 فيبروريءَ تائين موڪل جو اعلان ڪري ڇڏيو آهي.
زلزلي جي هزارين لوڏن سبب يوناني حڪومتي عملدار پڻ پريشان آهن ۽ جزيرن تي ايندڙ لاڳيتي زلزلي جي لوڏن بعد سائنسدانن پڻ اوڏانهن جو رخ ڪيو آهي.
يونيورسٽي آف ايٿنز جي زلزلو ماپيندڙ ليبارٽريءَ موجب 26 جنوريءَ کان 14 فيبروريءَ جي وچ ڌاري سائڪلاڊس جزيرن تي 19 هزار 200 کان وڌيڪ زلزلي جا لوڏا محسوس ڪيا ويا آهن.
امورگوس ۽ 3 ٻين جزيرن تي 11 مارچ تائين هنگامي حالتون لاڳو ڪيون ويون آهن.
