راولپنڊي (نيشنل ڊيسڪ) آرمي چيف جنرل عاصم منير چيو آهي ته اسان پنهنجي مذهب ۽ تهذيب تي فخر ڪيون ٿا ڪڏهن به خارجي فتني کي پنهنجي فرسوده سوچ پاڻ تي مڙهڻ نه ڏينداسين.
آرمي چيف جنرل عاصم منير سان سموري پاڪستان جي يونيورسٽين کان آيل شاگردن ملاقات ڪئي.
ان موقعي تي آرمي چيف جو چوڻ هو ته پاڪستاني عوام خاص طور تي نوجوانن جو پاڪ فوج سان هڪ مضبوط رشتو آهي، ملڪ دشمن عنصر فوج ۽ عوام جي وچ ۾ ڏار وجھڻ جي ڪوشش هميشه ناڪام رهي آهي ۽ رهندي، جيستائين قوم خاص طور نوجوانن سان گڏ بيٺا آهيون پاڪ فوج ڪڏهن به نه هارائيندي، اسان ڪامريڊن جيان وڙهي رهيا آهيون، اسان جي لاءِ پاڪستانيت سڀني کان اهم آهي.
سربراهه پاڪ فوج جو چوڻ هو ته اسان کي پنهنجي مذهب، تهذيب ۽ روايتن تي فخر آهي، هي خارجي فتني وارا ڪهڙي شريعت ۽ دين جي ڳالهه ڪري رهيا آهن؟ اسان ڪڏهن به خارجي فتني کي پنهنجي فرسوده سوچ ملڪ تي مڙهڻ نه ڏينداسين.
جنرل عاصم منير جو چوڻ هو ته خيبرپختون خوا ۽ بلوچستان جا غيرتمند ماڻهو دهشتگردن خلاف لوهي ڀِت جيان بيٺل آهن.
پاڪ فوج جي سربراهه جو چوڻ هو ته آرمي اڄ به خارجي فتني سان روزانون جي بنياد تي وڙهي رهي آهي، اسان مذهب جي انهن جي تشريح سان متفق نه آهيون. اسلام دنيا ۾ سڀ کان پهريون مذهب آهي جنهن عورت کي عزت ڏئي آسمان تائين پهچايو، ڀلي هڪ عورت ڇو نه ماءُ هجي، گھر واري هجي يا ڀيڻ هجي، ڪنهن به ڪردار ۾ اسلام عورت کي عزت ڏني آهي.
آرمي چيف جو چوڻ هو ته خارجي فتني وارا ڪير ٿيندا آهن انهن کان ان مقام کي کسڻ وارا؟ توکي اهو اختيار ڪنهن ڏنو آهي؟ ان کان ڪير به اهو کسي نٿو سگھي، اسان ان قسم جي گمراهه گروهه کي ڪڏهن به پنهنجي ملڪ تي پنهنجي اقتدار تي مڙهڻ جي اجازت نه ڏينداسين.
آرمي چيف چيو ته اسان خارجي فتني جي فسادين سان وڙهي رهيا آهيون، هي عنصر اسلام جي غلط تشريح ڪري رهيا آهن، خارجي عنصر اسلامي تعليمات جي ڀڃڪڙي ڪري رهيا آهن، فسادين جي باري ۾ اسلام جا احڪام تمام واضح آهن، رياست جي سامهون هٿيار ڦٽا ڪرڻ وارا رحم جي اميد ڪري سگھن ٿا.
