اسلام آباد (نيشنل ڊيسڪ) اسلام آباد ۾ ترڪيه ۽ پاڪستان وچ ۾ مختلف معاهدن تي صحيحون ڪرڻ واري تقريب ٿي، تقريب کي خطاب ڪندي ترڪيءَ جي صدر رجب طيب اردگان چيو ته پاڪستان جو دورو ڪري تمام گهڻي خوشي ٿي آهي.
قائداعظم ۽ علامه اقبال اسان جا به هيروز آهن. وزيراعظم شهباز شريف سان گڏيل پريس ڪانفرنس ڪرڻ دوران ترڪيءَ جي صدر چيو ته علامه انقلاب پنهنجي شاعري ذريعي انقلاب آندو.
پاڪستان اسان جو ٻيو گهر آهي، صدر آصف علي زرداري سان واپاري معاملن تي ڳالهيون ٿيون، گڏيل لاڳاپن کي وڌيڪ مضبوط ڪرڻ تي اتفاق ڪيون ٿا.
هن چيو ته اسان وچ ۾ 24 معاهدن ۽ مفاهمت جي يادداشتن تي صحيحون ٿيون، پنهنجن سيڙپڪارن کي پاڪستان ۾ سيڙپڪاري بابت ٻڌايو آهي.
ٻنهي ملڪن وچ ۾ 5 ارب ڊالرز جي واپاري ڪاٿي تي ڳالهيون ٿيون، بچاءُ ۽ دفاعي پيدواري شعبن ۾ سهڪار کي هٿي ڏيارڻ تي ڳالهيون ٿيون، وزيراعظم شهبازشريف ترڪيه جي زلزلي متاثر علائقن جو دورو ڪيو.
ترڪ صدر چيو ته ٻنهي ملڪن وچ ۾ لاڳاپن کي وڌيڪ مستحڪم ڪرڻ لاءِ ڪم ڪندا رهنداسين، دهشتگردي ۾ شهيد ٿيلن سان تعزيت جو اظهار ڪريون ٿا، دهشتگردي خلاف جنگ ۾ پاڪستان جي مڪمل حمايت ڪريون ٿا.
ان کان اڳ پريس ڪانفرنس کي خطاب ڪندي وزيراعظم شهبازشريف چيو ته حڪومت ۽ پاڪستاني عوام ترڪيه صدر جي آجيان ڪري ٿو، اميد آهي ته ترڪيه صدر جو پاڪستان جو دورو فائديمند ثابت ٿيندو.
هن چيو ته پاڪستان ۽ ترڪيه وچ ۾ ڀائراڻا لاڳاپا قائم آهن، پاڪ ترڪيه عوام وچ ۾ لاڳاپا ڏهاڪن تي ٻڌل آهن.
شهباز شريف چيو ته غزا صورتحال تي پاڪستان جو موقف واضح آهي، ترڪيه ٻوڏ سميت هر ڏکئي وقت ۾ پاڪستان جي مدد ڪئي آهي، ترڪيه ڪشمير مسئلي تي هميشه پاڪستان جي موقف جي حمايت ڪئي.
هن وڌيڪ چيو ته دهشتگرد ناپاڪ ارادن لاءِ افغان جي سرزمين استعمال ڪن پيا، سيڪيورٽي فورسز دهشتگردن خلاف ڪارروايون ڪن پيون.
