ججز جي بدليءَ سان رينڪ تبديل نه ٿيندي، چيف جسٽس اسلام آباد هاءِ ڪورٽ

اسلام آباد (نيشنل ڊيسڪ) اسلام آباد هاءِ ڪورٽ جي چيف جسٽس عامر فاروق نظرثاني ٿيل سينارٽي لسٽ ۾ ججن جي عهدن کي گھٽ ڪرڻ جو جواز پيش ڪندي گذريل فيصلن تي اعتماد جو اظهار ڪيو آهي، جنهن ۾ ڀارتي سپريم ڪورٽ جو هڪ فيصلو به شامل آهي، جنهن ۾بدلين ۽ مقررين کي الڳ ڪيو ويو هو.گذريل ڏينهن چيف جسٽس اسلام آباد هاءِ ڪورٽ جسٽس عامر فاروق جسٽس محسن اختر ڪياني، جسٽس طارق محمود جهانگيري، جسٽس بابر ستار، جسٽس سردار اعجاز اسحاق خان ۽ جسٽس ثمن رفعت امتياز طرفان سينارٽي لسٽ ۾ ترميم خلاف داخل درخواست رد ڪري ڇڏي هئي. هي فيصلو ججن جي بدلي ۽ سينارٽيءَ بابت آئيني قلمن ۽ عدالتي مثالن جو تفصيلي جائزو وٺڻ کان پوءِ جاري ڪيو ويو. هي معاملو ان وقت سامهون آيو جڏهن قانون ۽ انصاف واري وزارت پهرين فيبروريءَ تي هڪ نوٽيفڪيشن جاري ڪيو، جنهن ۾ 3 موجوده ججن جسٽس سردار محمد سرفراز ڊوگر، جسٽس خادم حسين سومرو ۽ جسٽس محمد آصف کي ان جي لاڳاپيل هاءِ ڪورٽس کان اسلام آباد هاءِ ڪورٽ بدلي ڪيو ويو هو. جسٽس سردار سرفراز ڊوگر جي بدلي لاهور هاءِ ڪورٽ، جسٽس خادم حسين سومرو جي بدلي سنڌ هاءِ ڪورٽ ۽ جسٽس محمد آصف جي بدلي بلوچستان هاءِ ڪورٽ مان ڪئي وئي هئي، هي تڪرار انهن بدلين کان پوءِ سينارٽي فهرست ۾ تبديلي جي چوڌاري مرڪوز هئي. اسلام آباد هاءِ ڪورٽ جي 5 ججن درخواست داخل ڪئي هئي، جنهن ۾ موقف اختيار ڪيو ويو هو ته آئين تحت هاءِ ڪورٽ جا جج ڪنهن ٻي هاءِ  ڪورٽ ۾ بدلي ٿيڻ کان پوءِ کين نئون حلف کڻڻ گھرجي، جنهن سان انهن جي سينارٽي رينڪون متاثر ٿيڻ گھرجن. اسلام آباد هاءِ ڪورٽ جي چيف جسٽس تفصيلي فيصلي ۾ جواب ڏنو، ان فيصلي ۾ ڪيل اهم قانوني اصولن جو حوالو ڏنو ويو، خاص طور ججن جي بدليءَ بابت آئيني قلمن ۽ بدلين ۽ نين مقررين جي وچ ۾ فرق واضح ڪيو ويو. چيف جسٽس آئين جي آرٽيڪل 200 جو حوالو ڏنو، جيڪو صدر پاڪستان کي هڪ جج کي هڪ هاءِ ڪورٽ کان ٻي هاءِ ڪورٽ بدلي ڪرڻ جي اجازت ڏئي ٿو. ان شرط تي ته جج جو راضپو ۽چيف جسٽس آف پاڪستان ۽ لاڳاپيل هاءِ ڪورٽس جي چيف جسٽس سان صلاح کان پوءِ ڪيو وڃي.