موت جي چڪي ۾ آهيان، سيل جي بجلي به بند آهي: عمران جو آرمي چيف کي ٻيون خط

راولپنڊي (نيشنل ڊيسڪ) باني پي ٽي آءِ عمران خان چيف آف آرمي اسٽاف، جنرل عاصم منير کي ٻيون خط لکي ڇڏيو آهي، عمران ان طرفان آرمي چيف جنرل عاصم منير کي لکيل خط ۾ چيو ويو آهي ته مون ملڪ ۽ قوم جي بهتريءَ خاطر نيڪ نيتيءَ سان آرمي چيف جي نالي کليل خط لکيو آهي، مون جن 6 نقطن جي نشاندهي ڪئي آهي ان تي عوامي راءِ ورتي وڃي ته 90 سيڪرو عوام منهنجي حمايت ڪندو. خط ۾ عمران لکيو ته پري پول ڌانڌلي ۽ اليڪشن جا نتيجا تبديل ڪري حڪومت قائم ڪئي وئي، عدليه تي قبضي لاءِ پارليامينٽ مان 26 هين آئيني ترميم پاس ڪرائي وئي. ظلم ۽ ڏاڍ خلاف اٿندڙ آوازن کي بند ڪرڻ لاءِ پيڪا لاڳو ڪيو ويو، سياسي عدم استحڪام ۽ ”ڏاڍي جي لٺ کي ٻه مَٿا“ جيان ملڪي معيشيت تباهه ڪئي وئي. باني پي ٽي آءِ خط ۾ لکيو ته ملڪ جي سڀ کان وڏي سياسي پارٽي کي لاڳيتو نشانو بڻايو پيو وڃي، بنيادي انساني حق پائمال ڪندي مون تي دٻاءُ وڌائڻ لاءِ جيل انتظاميه مون تي ظلم ڪري رهي آهي، مون کي موت جي چڪي ۾ رکيو ويو آهي، 20 ڏينهن تائين مڪمل لاڪ اپ ۾ رکيو ويو جتي سج جي روشني به نه پهچندي هئي، پنجن ڏينهن تائين منهنجي سيل جي بجلي بند رکي وئي ۽ مان مڪمل اوندهه ۾ رهيس. عمران خان آرمي چيف کي لکيل خط ۾ شڪايت ڪئي ته منهنجي ورزش ڪرڻ وارو سامان ۽ ٽي وي تائين کڻي ويا آهن، مون تائين اخبار به پهچڻ ناهي ڏني ويندي، جڏهن چاهين ٿا ڪتاب به روڪي ڇڏين ٿا. عمران خان چيو ته منهنجي پٽن سان گذريل 6 مهينن ۾ صرف 3 ڀيرا ڳالهرايو ويو آهي، پٽن سان ڳالهائڻ جي معاملي تي عدالتي حڪم تي عمل نه پيو ڪيو وڃي، گذريل 6 مهينن ۾ ڳڻپ جيترن ماڻهن کي ئي مون سان ملڻ ڏنو ويو، اسلام آباد هاءِ ڪورٽ جي واضح حڪمن باوجود منهنجي گھر واريءَ سان ملاقات ناهي ڪرائي وئي، منهنجي گھر واريءَ کي به قيد ڪيو ويو آهي. عمران خان جي لکيل خط موجب اسان جا 2000 کان وڌيڪ ورڪرز، سپورٽرز ۽ ليڊرز جي ضمانت جون درخواستون عدالتن ۾ ٻڌڻيءَ هيٺ آهن، پيڪا جھڙي ڪاري قانون ذريعي سوشل ميڊيا ۽ انٽرنيٽ تي به راتاهو هنيو ويو آهي.