دنيا ترڪ ڪندڙ ممتا ڪلڪرنيءَ جو اعتراض جوڳي فوٽو شوٽ تي موقف

ممبئي (شوبز ڊيسڪ) بالي ووڊ جي ماضيءَ جي سپرهٽ اداڪارا ۽ تازو ئي دنيا ترڪ ڪري سنياس وٺندڙ ممتا ڪلڪرنيءَ پنهنجي اعتراض جوڳي فوٽو شوٽ تي چپ چوريا آهن. 90ع جي ڏهائيءَ ۾ بالي ووڊ تي ڇانيل رهندڙ ممتا ڪلڪرنيءَ تازو ئي ان وقت خبرن جي زينت بڻي جڏهن هوءَ وڏو عرصو پرڏيهه ۾ رهڻ کان پوءِ واپس ڏيهه وري، ان کان پوءِ هن سنياس ورتو ۽ سرخين جي زينت بڻجي وئي. اداڪارا پنهنجي ٿورڙي ڪيريئر دوران ڪيترن ئي تڪرارن جو شڪار پڻ رهي، جنهن ۾ بولڊ فوٽو شوٽس کان وٺي منشيات فروشن ۽ انڊر ورلڊ سان مبينا لاڳاپا پڻ شامل آهن. تازو ئي اداڪارا رجت شرما سان ”آپ ڪي عدالت“ ۾ شرڪت ڪئي، جتي اداڪارا لاڳاپيل فوٽو شوٽ بابت چيو ته مان ان وقت نائين جماعت جي شاگردياڻي هيس ۽ مون کي هالي ووڊ اداڪارا ڊيمي مور جي تصوير  ڏيکاري وئي جيڪا مون کي نامناسب نه لڳي. اداڪارا وڌيڪ چيو ته ان وقت مان ڪنواري هيس ۽ اها ڳالهه شايد گھڻن ماڻهن کي هضم نه ٿئي. سندس چوڻ هو ته گھڻن ماڻهن جو خيال آهي ته نوان اداڪار بالي ووڊ ۾ داخل ٿيڻ لاءِ ڪجھه به ڪري سگھن ٿا، هن مڃيو ته ڪجھه ماڻهو پئسن لاءِ اهو رستو اختيار ڪن ٿا پر مون ايئن نه ڪيو. مون کي ان وقت گھڻي سمجھه نه هئي ان لاءِ مان سمجھي نه سگھيس ته عريانپ ڇا ٿيندي آهي، جيڪڏهن توهان جنسي طور گھڻو آگاهه نه هجو ته توهان ان کي عريانيت يا فحاشيءَ سان جوڙي نٿا سگھو.